旺角有位瓷器舖少東，顧客稱呼他為「靚仔老闆」，他是店舖第三代接班人曾書浩。曾書浩幫父母打理生意，破舊立新賣砂煲罌罉也賣護膚品，兩父子經常意見相左，鬧得面紅耳赤。豬年將到，曾書浩又有新搞作，早前他不惜工本復刻一批懷舊紅膠豬仔錢罌，結果賣個滿堂紅，令父親老淚縱橫，放心讓兒子繼承衣鉢。
撰文：黎國剛
攝影：詹家志
 |
 |
近來曾書浩的店舖憑復刻六、七十年代的紅膠豬仔錢罌而聲名大噪，不少顧客遠道而來，有人一次過掃走十隻八隻紅膠豬，舖內1,000隻存貨一下子賣光。他回想最初所以尋尋覓覓，走訪十多間工廠始找來一間答應開模重塑紅膠豬仔錢罌，原本就不是打着如意算盤，為的是留住老街坊的集體回憶。
陳年膠豬炒至$6,800
事緣約一年前有顧客透過facebook找尋陶瓷製的豬仔錢罌，曾書浩舖中有存貨，兩人相約地鐵站交收，到來的是一位40多歲女顧客。當女顧客看到陶瓷豬時，突然情不自禁爆喊，「當時好突然㗎，嘩搞咩呀？行過啲人仲望住我，以為我整喊佢㖭！」曾書浩說來尷尬，「原來佢話搵隻陶瓷豬好耐都搵唔到，之後仲問我有冇紅膠豬」。
無論是陶瓷豬或紅膠豬，對該名女顧客而言肯定別具意義，但曾書浩沒有細問，隨即答應對方幫忙找尋紅膠豬。殊不知原來紅膠豬仔錢罌已消失於歲月中，一早絕迹市場，曾書浩遍尋不獲，即使在網上難得找到一隻由網民放售的陳年大膠豬，竟炒上6,800元天價；於是他就萌生重塑紅膠豬仔錢罌的念頭。
對曾書浩來說，紅膠豬仔錢罌是昔日家家戶戶必備用來儲錢的玩意，記載着大家的美好回憶。雖然他是80年代出生，今年33歲，但小時候也有一隻。「紅膠豬畀我最後嘅印象，係讀小學六年班時，記得嗰時自己住唐樓，有日見隻豬仔錢罌點解斷開咗喺床邊嘅？」他依稀記得，「係有賊偷嘢，可能個賊隔住窗偷唔走成隻豬仔錢罌，就劏開咗偷走裏面啲錢，將隻膠豬掟返喺度！」
事隔多年，雖然是慘慘豬的舊事，但回想也是甜。近日顧客來到他的瓷器行搶購紅膠豬，大家還分享當年用紅膠豬仔錢罌儲錢的樂事，「個個顧客都講吓昔日點樣養肥隻豬，最開心就係劏豬，呢個就話點樣喺隻豬身上挑啲錢出嚟，嗰個又話點樣剪開隻豬……」說來大家也像孩童一樣開心。
也許曾書浩當初幫父母打理瓷器行時，沒想到如此一間小店可以充滿人情味。舖頭位於旺角廣東道，原本是曾書浩的叔公向業主租來經營的，但多年前叔公思退，曾經在同區煙廠街經營廚具雜貨店的曾父接手將舖頭租下來。當時曾書浩沒有幫父母打理舖頭，因為他自中七畢業後就一直往外闖，曾經從事送報紙、機場接待員、實驗室助理、樓面、到建築師樓做助手，以至行船工作都試過，他笑言：「我嘅志願就係乜嘢工都試吓！」直至2014年，曾父因患白內障需入院做手術，打理瓷器行的重任自然落到兒子身上，曾書浩只得回家幫手。
自接手生意後，曾書浩一心大展拳腳，銳意改革瓷器行守舊的經營模式，首先為舖頭開設facebook專頁吸客，又自製工作服印上舖頭名稱，改變形象；更從網上了解潮流趨勢，引入各類時款商品，包括電子產品、燈飾玩具，以至護膚品統統有售。缸瓦舖賣護膚品很怪？曾書浩也直認在他改革下，瓷器行恍如雜貨店，甚至熟客叫他靚仔老闆也是他的主意，「係我逼啲客咁叫我嘅，因為我喺facebook話咁叫我可能會有禮物送」。
推前老舖 遺落了父母
當曾書浩認為父母的經營方針不合時宜，反過來父母亦擔心他的做法太冒險，兩父子經常為此爭執。「成日拗嘅，爸爸話執咗佢，我話好呀，係執就𠵱家拉閘！」曾書浩說來晦氣，形容父親「成日賣一兩蚊啲嘢，賺唔到錢」，做法太保守。「好似爸爸話叔公幾十年都冇賣保鮮紙，就唔好賣，咁我話街坊用緊就要賣啦；又好似膠地蓆咁，又重又跌落嚟，由朝到晚剪地蓆都剪唔掂，阻碇又賣唔多，唔想再搬來搬去，但爸爸又話幾十年街坊始終有需求」。
轉眼間，曾書浩打理瓷器行已有五年光景，曾父亦認同兒子將舖頭成功轉型，「多咗好多年輕嘅、好遠嚟嘅客」。不過曾書浩心態又變了，「之前因為想賺錢乜都想賣，乜都想做，一直將舖頭向前推，但就忽略咗身後面嘅父母」。
原來去年他與母親大吵一場後母親突然中風，入院一段時間始逐漸康復。他記不清當時為何爭吵，「都係話舖頭呢樣唔係咁，嗰樣唔係咁」，事後他非常自責，學會了放下，更重視與家人及街坊的感情。如今曾書浩對舖頭生意比較隨遇而安，「傳統舊貨係老竇負責，新貨就我負責」，兩父子肩並肩，感情不言而喻。