【迎豬接福】
先後離開無綫的伍詠薇、沈卓盈、樂瞳、陸詩韻、李思欣和黃婉曼六位靚女，相約到中環食開年飯，一枱美食，十分豐富，寓意全年都豐衣足食，她們更一齊玩「撈起」，於今日大年初二祝願大家在豬年都「撈得更掂」，伍姑娘更睇好沈卓盈三喜臨門。
伍詠薇、沈卓盈、樂瞳、陸詩韻、李思欣和黃婉曼六位靚女先後離開無綫，向外闖後，她們的發展更有「錢」途。今日大年初二，六位靚女邊吃開年飯，邊互相祝願豬年行大運，未婚的沈卓盈、樂瞳、陸詩韻更大講祝福語𢭃利是。
姍姍來遲的伍姑娘風騷說：「唔好意思，我遲咗嚟，真係好多嘢撈。有唔同平台搵我，好多工作。」五位妹妹醒目向伍姑娘拜年，她即逐一派利是，伍姑娘看到黃婉曼巨肚，她識做說：「派畀你入邊嗰個。」沈卓盈和樂瞳分別賣口乖，伍姑娘笑問：「你兩個邊個大、邊個細？」伍姑娘贒着低胸的樂瞳說：「派身材你先。」伍姑娘轉身派利是給沈卓盈：「年紀細係你。」伍姑娘又搞笑問陸詩韻：「我懷疑你結咗婚。」陸詩韻笑着回應只是太多緋聞。
爽手派利是的伍姑娘幽默說：「我派嘅利是，講明先係意頭，就算入面寫住『身體健康』，你哋都要接受。我同舊公司一樣，10蚊封利是，係咪差唔多？」眾女面面相覷，伍姑娘再說：「冇人敢答，哈，我講亞洲電視啫，唔係『之之之』呀。」伍姑娘發現身邊剛離巢的沈卓盈一臉尷尬，她揶揄：「佢（沈卓盈）好明顯好驚，原來最笠水係佢。」六女不停「吹水」，氣氛熱鬧。
離巢六女看到枱上的撈起、蝦球、金蠔、烤雞、星斑球、叉燒、炒飯和大煎堆，有魚有肉即食指大動。她們最雀躍舉筷玩「撈起」，她們邊撈邊說：「豬年要越撈越旺。」其實計埋黃婉曼肚中陀的豬女，她們算是賀年版「七公主」。講到豬年大計，靚女們各有大計，離開無綫六年的伍姑娘被公認撈得最掂，近年她走勻各大電視台，也有北上拍劇，近日又接拍了ViuTV新劇，伍姑娘先說：「以前以為大樹好遮蔭，原來出去闖吓，同唔同單位合作先係好嘅，有新鮮感，唔會拍嚟拍去都係見到相同對手。我鍾意跟唔同平台合作，收入比以前好咗。」伍姑娘也贈言剛離開無綫的小師妹沈卓盈：「我覺得佢係『非池中物』，我有留意佢，佢一路有進步。佢好勤力，捉唔住，希望佢出到去越撈越掂。」
沈卓盈去年底約滿無綫，告別工作了16年的娘家，回復自由身的她，事業再起步，獲男友默默支持，臉泛光彩的她今年大有機會紅鸞星動，同時結婚生仔？沈卓盈衝口而出：「我想兩樣一齊，向住呢個方向。」伍姑娘即祝她「三喜臨門」，包括事業都有好發展。
已離開無綫九年的陸詩韻，近年經營護膚品生意，她說：「有人話每十年會有嘢發生，我向來好謹慎，我覺得呢一年會越嚟越好。」同樣離巢九年的黃婉曼也說：「我當時離開係因為冇乜安全感，我就撤退，我呢幾年有去學整麵包，2019年會開新麵包舖。」
樂瞳學投資
樂瞳離開無綫一年多，自由身的她搏命接工作，荷包大進賬：「跳咗出去，我做咗好多網上嘢，拍多咗飲食旅遊嘢。新一年我準備學吓投資，增值自己。」思欣去年也入股娛樂公司，升呢老闆娘，她說：「我離開無綫都六年，呢段時間見識多咗。」
撰文：比華利
攝影：林德雄
場地提供：大官廳