上個月，DoDo姐post咗張同宣萱、吳美珩、丘凱敏、顧紀筠同劉曉彤嘅合照，班網民見到吳美珩，那些年嘅回憶即刻返晒嚟！
呢日咁啱又俾壹仔撞到好少見到嘅吳美珩一個人行supermarket！戴住頂帽又戴埋副超，黑白橫間外套，黑色長boot，雖然佢冇做幕前，但星味仲係咁重！最勁係咩呀？46歲嘅佢，keep得勁好，zoom近啲塊面睇吓，真係好似剝咗蛋殼嘅雞蛋咁，好白滑！
唔好以為佢做咗闊太就好鍾意晒命，睇吓佢雙手戒指都冇隻，耳仔又冇耳環，同佢作風一樣咁低調！其實佢名下持有兩間半山物業，其一仲係複式，分別喺2003年以千三萬，以及2008年四千一百八十萬買入。據知而家一間約值五千幾萬，複式更加億億聲。雖然作風低調，但講到底都有個百億老公，低調極，點都有個司機車出車入，同埋幫手拎嘢嘅！
01年，吳美珩有個拍咗5年拖嘅億萬台灣富豪男友王華麟同佢求婚。當時，正係吳美珩嘅事業上位期。吳美珩自認係個戀愛大過天嘅人，對於老公王華麟，佢話：「當時有The One嘅感覺，彼此認定咗對方！」聽佢講，由day one同王華麟拍拖開始，佢就認為對方係自己嘅Mr.Right，佢仲話：「我對自己講要珍惜佢，因為我一向明白無任何嘢係應該嘅，我要珍惜所有！」
就係咁，吳美珩01年秘密下嫁王華麟，07年生咗個女後就息影，11年生埋個仔，湊成一個「好」字！