林文龍入行31年，儘管有不少人認定他是一個難相處的人，但林文龍笑自己是鱷魚頭老襯底，因當年年少氣盛，親手推走不少機會。歷盡人生的起起跌跌，行過一關又一關後，他坦言：「我唔會覺得係可惜，亦唔需要埋怨，如果唔係每一日會過得好頹廢同唔開心，人係需要展望將來，明天係會更好。」
撰文：何慧斯
攝影：林德雄
離巢9年的林文龍，去年回巢拍劇集《不懂撒嬌的女人》後，再和監製關樹明合作《再創世紀》，今次飾演迷債設計者兼基金代理人Duncan，與《不》劇演Gordon的感覺截然不同，眉宇間有林文龍的特質浮現。
「我唔會埋堆」
日前林文龍在尖沙嘴接受訪問，坦承自己與Duncan有點相似，他笑說：「我覺得係有啲似，唔只外形，其實我本身唔係太埋堆、太social嘅人，我會覺得知我嘅係一定會信我，如果你搵我拍戲要我埋堆，我諗我唔會做呢樣嘢，搵得我係因為我適合呢個角色，欣賞我呢個人。」他還說：「不過呢個角色喺呢段時間落喺我手，係好嘅timing，事實上喺呢幾十年，無論喺圈內圈外都經歷高低起跌，喺我嘅記憶系統，又或者歷史有一定嘅資料畀我參考，所以𠵱家嘅角色喺我手，可以加啲經歷入去角色，但係如果呢個角色喺十幾年前出現，相信會演得比較吃力。」
提到戲中有一幕對潘志文說：「我其實唔係咁難相處。」這句話是否代表心聲？林文龍說：「我入行31年，一路以嚟好多人覺得我好cool，難聽啲講覺得我好寸，不過識得耐咗，你會發覺我唔係一個難相處嘅人，其實我係鱷魚頭老襯底嘅人，純粹係外表，熟咗之後係無所不談，我都好深明呢樣嘢，但係我都冇辦法，惟有去韓國整整佢。」
親手推走機會
對於多年經歷，林文龍坦言：「唔可以講後悔，以前年少氣盛嘅時候，好多嘢得嚟太容易，唔識得珍惜同把握機會，我自己親手推走嘅機會亦都不少，呢個咪就係經歴，如果冇呢啲嘢，今日就唔可以數得番出嚟，可以提醒自己曾經咁樣，到今日再出現某啲嘢嘅時候，知道點樣處理，把握每一個機會，唔會輕易放棄。好似人際關係，多個朋友好過多個敵人，呢啲係累積番嚟。」更勉勵自己展望將來，他說：「我唔會覺得係可惜，亦唔需要埋怨，如果唔係每一日會過得好頹廢同唔開心，人係需要展望將來，明天係會更好。」
場地提供：Cafe Deco峰景餐廳（The ONE）